Día la llingua Materna -Autu d'Homenax a la Llingua Llïonesa en S. Andrés del Rabanedo-

 En Noviembre y 1999, sigiendu la nniciativa de Bangla Desh, la Conferencia Xeneral de la UNESCO decidióu proclamare Febreiru y 21, cumu’l Día Entrenacional la Llingua Materna, data que dende nestoncias se tien cellebrada en tol mundu dende l'annu 2000.

Esta declaración, motivada pula importancia que la UNESCO concede a la diversidá cultural y llinguística pa las sociedaes sostenibles y al sou trabayu pa preservare las desemeyanzas de culturas y llinguas que fomentan la tolerancia y el respetu de los demás, nun llogróu impedire que la diversidá llinguística s'alcuentre ca vuelta más menazada ya qu'en promediu, ca duas selmanas esapaez una llingua cuna currempondiente esapaición de tol sou patrimonnu cultural y inteleutual.

Non ostante, la conocencia la importancia que tienen las llinguas maternas, tien algamaos importantes llogros en materia d'educación plurillingue, anque queda mueitu camín pur percorrere.
Pa la UNESCO, las sociedaes multillingues y multiculturales esisten al trabiés las suas llinguas, que tresmiten y  caltienen las conocencias y las culturas tradicionales de xeitu sostenible.

Esti annu 2023, el Día Entrenacional la Llingua Materna, se dedicará a la tema “Educación Multillingue (EML) la necesidá de tresformare la educación” y esplorará y debatirá sobru'l potencial del multillinguismu pa tresformare la educación dende una visión de deprendizax permanente y en desemeyaos contestos al trabiés de las tres temas darréu:

-Potenciare la educación multillingue cumu necesidá pa tresformare la educación en contestos billingues dende la educación infantil y mueitu más allá.

-Sofitare'l deprendizax al trabiés la educación multillingue y el multillinguismu en contestos globales camudantes y en situaciones de crisis, incluyíos los contestos d'emerxencia.

-Revitalizare las llinguas en vía d'esapaición ou en pelligu d'estinción.

Salón de Plenos del Ayuntamiento de S. Andrés del Rabanedo

Dende las Asociaciones de la Llingua Llíonesa “El Fueyu” y  “L’Alderique” y la Plataforma “La Parva” consideramos, na mesma sintonía que la UNESCO, que la esapaición d'una llingua, cualisquiera qu'ésta seya, ye una pérdida pa tola humanidá al traducise nuna pérdida cultural que nos emprobez a toos pulu que, modestamente, cunos medios que tenemos, tentamos de fomentare'l billinguismu nel nuesu ámbetu d'autuación.
Cumu quiere qu'este annu, el Día la Llingua Materna cae en Martes d'Antruexu, las tres asociaciones enantias nomadas, decidimos treslladare la celebración al prósimu vienres, Febreiru y 24, muerganizandu un Autu d'Homenax a la Llingua Llïonesa que cellebraremos a partire las 19,00 houras nel Salón d'Autos del Ayuntamientu de San Andrés del Rabanéu, Rua Los Picones, ensín nº, CP 24191.
N'ese autu, amás d'apresentare las espublizaciones que tenemos editáu n'estos tres cabeiros annos y que facen parte del nuesu proyeutu cultural, contaremos cuna collaboración los escolines los Cursos de Llingua Llïonesa que tamos impartiendu na Casa Cultura de Trobayu d'Enriba.
Deseyamos agradecere al Ayuntamientu de San Andrés y a la sua Alcaldesa tol sou sofitu tantu pa la cellebración d'este Autu cumu pa la impartición los Cursos de Llingua Llïonesa que ya van camín de cincu annos.
Tol mundu tá invitáu cun entrada llibre y de baldre ata completare l'aforu.
Asperamos qu'a modín, la llingua llïonesa recupere'l llugar que merez n'el mundu y na nuesa vida diária, cumu parte integrante la nuesa identidá llïonesa y la cultura universal.