12 ene. 2012

Llingua Llïonesa
http://www.nodo50.org/agora/?q=lli%2Fante-desproteicion-del-lliones
llingua.jpg
Ante la desproteición del Llionés
Dende AGORA País Llionés queremos denunciar la pasividá por parte de la Xunta de Castiella y Llión ante'l patrimoniu cultural que constitúi la nuesa llingua llionesa, y la falta de dereitos y el despreciu que supón la situación d'inmovilismu ante los falantes d’esa llingua; faciendo oyíos xordos ante'l resolvimientu del Procurador de Castiella y Llión qu'encamienta a la ellaboración d'una norma que garantice “la proteición, usu y promoción” del Llionés conforme al conteníu del Estatutu de Castiella y Llión nel so artículu 5.2, magar que las mesmas Cortes de Castiella y Llión amosáronse favoratibles por unanimidá a la proteición del Llionés en cumplimientu del testu estatutariu, según a outras iniciativas propuestas a las Cortes como la declaración como BIC del Filandón, que supondría la reconocencia del Patrimoniu Inmaterial de la Tradición Oral Llionesa.
Abarruntamos que la pasividá ante esta parte del patrimoniu cultural llionés va na llinia de persecución cultural ya ideolóxica unificadora que pretende'l gobiernu de la Comunidá Autónoma dende la súa creación.

Paeznos inalmisible que s'espongan argumentos económicos como escusa pa siguir nesta situación, entres la Xunta de Castiella y Llión financia la economía de dous entes n’apariencia privaos (la Fundación Villalar-Castiella y Llión, y l'Institutu Castellanu y Llionés de la Llingua) con unos presupuestos escomanaos (superiores a 2 millones d'euros) y que tienen por oxetivos la estéril intención de llantar el sentimientu de pertenencia a l'autonomía, y crear tracamundiu espintando la realidá histórica y cultural de los pueblos Llionés y Castellán.
Tenemos el precedente de los cómics y las diversas denuncias realizadas por padres y madres del alumnáu ante la negación, manipulación y atrapecimientu del Reinu de Llión na Historia, nos llibros de testu de la manu la Fundación Villalar, y el pasu por altu de la llingua llionesa denominándola “castellán tradicional” nun diccionariu creáu pol Institutu Castellanu y Llionés de la Llingua.
Consideramos que l'Institutu Castellanu y Llionés de la Llingua nun ye la institución a la que correspuende la promoción y divulgación del nuesu patrimoniu llingüísticu, pola cenciella razón de que nun ye una institución pública nin el Llionés entra dientro de los sous fines, según los estatutos d’esa organización, y qu'hasta’l momentu enxamás realizóu nenguna actividá nesi sentíu.
Queremos facer un chamáu a la sociedá llionesa polo xeneral pa que se presenten queixas al Procurador del Común de Castiella y Llión, como midida de presión por que se lleven a cabu las actuaciones necesarias que garanticen los dereitos llingüísticos de los falantes de Llionés acordias colo afitáu nel artículu 5.2 del Estatutu de Castiella y Llión, l'artículu 3.3 de la Constitución Española, asina como cola Carta Europea de las Llingüas Rexonales y Minoritarias roblada pol Estáu Español (na que declara que las Llingüas Rexonales y Minoritarias del estáu son, a efectos de la Carta, tantu las oficiales como las protexidas pol Estatutu de cada Comunidá Autónoma) y la Declaración Internacional de Dereitos Llingüísticos de la UNESCO.
::::::::::::::::::::::::::::::::::

QUÉIXATE POLA DESPROTECCIÓN DEL LLIONÉS

Nel añu 2007 reformóuse l’Estatutu d’Autonomía de Castiella y Llión quedando redactáu’l sou artículu 5.2 asina:
“El llionés será oxetu de protección específica polas instituciones pol sou particular valor drento del patrimoniu llingüísticu de la Comunidá. La sua protección, usu y promoción serán oxetu de regulación”.
Yá pasoron cuatro años dende la reforma estatutaria y el Gobiernu de Castiella y Llión nun establecíu nenguna midida pa la protección del llionés, nin dictóu ou promovíu nenguna regulación pa la sua protección, promoción y usu. El reiteráu y grave incumprimientu pol Gobiernu de Castiella y Llión del artículu 5.2 del Estatutu contrasta cola protección que se-y da al gallegu, que se puede estudiar como materia optativa na enseñanza regrada nos centros d’enseñanza primaria y secundaria de las zonas llionesas y zamoranas onde se fala esta llingua, y cola promoción de la enseñanza de la llingua vasca en Castiella y Llión, pues en marzu de 2011 inauguróuse na provincia de Burgos una escuela infantil pública onde ye posible estudiar vascuence, onde ya hai outra ikastola, y na que’l Gobiernu autonómicu invirtíu 600.000 €, comprometiéndose a siguir emburriando la enseñanza del euskera, llingua que nun tien nenguna reconocencia nel Estatutu de Castiella y Llión, a diferencia del llionés y el gallegu que si son llinguas protexidas nesta Comunidá.
Dende FACEIRA, y de maneira coordinada con outras asociaciones y colectivos de defensa del patrimoniu llingüísticu llionés, estamos presentado queixas al Procurador del Común de Castiella y Llión col fin de denunciar esta situación d’incumprimientu del artículu 5.2 del Estatutu, y la marxinación y discriminación p’hacia los falantes de llionés pola alministración autonómica.
Queremos invitar a la ciudadanía a quéixase ante’l Procurador del Común contra’l Gobiernu de Castiella y Llión y pa ello axuntamos un FORMULARIU que, previamente rechenáu colos datos personales y firmáu, puede presentase por distintas vías (onque recomendamos pola sua cenciellez, rapidez y gratuidá la primeira d’ellas):

A.- POR INTERNET:
Nesti casu hai que siguir unas mínimas instrucciones:
1.- Dir al formulariu de queixa en llinia del Procurador:
2.- Rechenar los campos colos datos personales: FORMULARIO DE CONTACTO, y DATOS OPCIONALES.
3.- Copiar del formulariu de queixa qu’axuntamos los párrafos onde s’esplica la queixa (párrafos PRIMERO a QUINTO), y tamién el párrafu final onde s’especifica la queixa (escomienza con estas palabras: SOLICITO AL PROCURADOR DEL COMÚN:…).
Pegalo todo onde pon: “Exposición de la queja”.
4.- Lleer y aceptar la política de privacidá.
5.- Calcar onde pon unviar.
6.- Las queixas presentadas por Internet tenerán que se ratificar cola firma del interesáu. Pa ello, los reclamantes recebirán na sua casa una copia de la queixa feita por esti mediu pa la sua devolución, una vez firmada, por corréu ordinariu (facilitaráse-ys de baldre un sobre prefranqueáu).

B.- POR CORRÉU ORDINARIU POSTAL A LAS SIGUIENTES SEÑAS:
Imprimir el modelu de queixa colos datos personales y firmáu, y remitilu vía postal a estas señas:

JAVIER AMOEDO CONDE
PROCURADOR DEL COMÚN DE CASTIELLA Y LLIÓN
SIERRA PAMBLEY 4
24003 LLIÓN

C.- PRESENTACIÓN DIRECTA EN CUALESQUIER OFICINA DE REXISTRU DEL GOBIERNU DE CASTIELLA Y LLIÓN:
Imprimir el modelu de queixa colos datos personales y firmáu, y presentalu directamente en cualesquier oficina de rexistru del Gobiernu autonómicu.
D.- PERSONALMENTE NA MESMA OFICINA DEL PROCURADOR DEL COMÚN:
Imprimir el modelu de queixa colos datos personales y firmáu, y presentalu directamente na Oficina del Procurador del Común: C/ SIERRA PAMBLEY 4, 24003 LLIÓN.

E.- POR FAX:
Imprimir el modelu de queixa colos datos personales y firmáu, y unvialu por fax a dalgún de los siguientes númaros: 987 270 143 / 987 273 141
Agradecemos a la ciudadanía la sua implicación nel procesu reivindicativu pa la defensa de la nuesa llingua y de los sous falantes.

http://faceira.org/queixate-pola-desproteccion-del-lliones

No hay comentarios: