5 nov. 2018

Un güeyu dende la esquierda

El próximu sábadu, 10 de noviembre de 2018, el nuesu colectivu desenvolverá nel Ateneo Varillas de la ciudá de Llión, asitiáu na Calle Varillas númaru 3, una xornada política a lo llargo de la cuala cuatro compañeras falarán sobre diferentes aspectos relacionaos con dalgunos de los eixes fundamentales de Xuntanza, cumo son el feminismu, la identidá llionesa, l’ecoloxismu ou’l dereitu a decidir.

La xornada escomecipiará a las 12,00 cona ponencia Muyeres llionesas esqueicidas pola historia, a cargu de la compañera Miryan Rodríguez, au faremos un análisis de dalgunas de las figuras femeninas llionesas con un papel fundamental na historia del nuesu país qu’inda güei nun reciben el reconocimientu que daveras ameritan.


A las 13,00, Xuan Getino abordará na conferencia ¿Qué ye eso de ser llionés? dalgunos de los interesantes elementos que constituyen lo que podríamos chamar cultura llionesa, onde mentará también aspectos cumo la nuesa respuesta al mediu ou comportamientos contidianos de los que nun nos decatamos por llevalos a cabu tódolos días y, sicasí, forman parte de la nuesa idiosincrasia cumo puebru.

De tarde, a las 18,00, el compañeiru Carlos Rodríguez abordará la importancia del cuidáu de especies autóctonas qu’ameritan la sua protección y suponen valores ecolóxicos daveras importantes no País Llionés, focalizando nesti casu na truita a traviés de la sua ponencia La truita, un valor ecolóxicu non-protexidu elemental no país.

Ignacio Traseira pechará la xornada a las 19,00 con una ponencia na que falará d’un amiente de total actualidá pola cuestión catalana cumo ye’l dereitu a decidir y que no casu del nuesu país cobra una especial importancia pola sua negación por sistema dende cuantayá dica güei: El Dereitu a Decidir, una negación sistemática no País Llionés.


L’accesu será llibre hasta chenar l’aforu.

¡Vémonos en Varillas el próximu sábadu!

No hay comentarios: