El Museo Etnográfico Provincial escoyiéu cumu pieza del mes de febreiru la mázcara de Campanón de la localidá de Pozos, que puede vese na esposición permanente de la institución na área d’antroidus, al pía d’outras mazcaradas de la provincia
L’inxenieiru industrial y etnógrafu, Iván Martínez Lobo va ser l’encargáu d’esplicar al públicu cúmu se facía esti ritu ancestral cuando principiaba l’enviernu y la sua relación cuno solsticiu d’enviernu, amás d’outros personaxes que forun apareciendo na comarca Cabreiresa y n’especial na localidá de Pozos, nún actu que va tener llugar no muséu a las seis y media de la tardiquina del sábadu 13 de febreiru.
En casi tódalas localidades de Cabreira, a finales d’añu y principios del siguiente, aparecen unus personaxes curriendo, cun chucayos culgando, entiznando, atronando y golpiando, y cunas caras cubiertas cun caretas espantosas, son estus “demones” a lus que chaman campanones, campaneirus, farramacus, remixacus… acompañaus pur outrus seres zoomorfus que representan a animales, y pur personaxes más modernus, añedidus nos últimus añus, éstus pa facer comedias y cuntar hestorias. Son las mazcaradas d’enviernu.
On hai puebrus en Cabreira que mantuvierun la tradición hasta fa bien poucu, unu d’eillus yíe Pozos, onde se mantién la tradición de la mazcarada de xeitu más puru cun inclusive un cultu arbóreu rellacionáu directamente cuno ramu llionés. Outrus puebrus que mantuvierun hasta bien entraus lus añus 80 forun Mazaneda cunus sous Campaneirus, Quintaniella cunus sous Campanones y La Baña cunus sous Mantarracus. En La Cuesta, onque perdida la tradición van yá 50 añus, recuperorun la mazcarada l’añu pasáu y denen ñestoncias llevan participando en mueitas concentraciones d’esta singular tradición.
No hay comentarios:
Publicar un comentario