“El Conceyu Abiertu”
“Si perdiéranse tolas lleis d’Hespaña, acontindarían los llïoneses faciendo vida reglamentada, al emparu de las suas costumes”
“Nadie coñoz l’enxendra del concillium ou conceyu abiertu, que s’empondrá endeiquí la Era Media nelos territorios de los vieyos reinos cristianos, tou paez indicare que nun yé heredencia direuta del monecipiu romanu, en cuantas que’l sou desendolque asítiase nelos siegros X-XII y comu tal puede considerase com’un xeitu istitucional altumedieval, creyáu y medráu baixu los bixueños condicionantes repobladores ou de reconquista y nel marcu de los reinos cristianos ente los que espuntia la monarquía astur-llïonesa”
Asegura LAUREANO M. RUBIO PÉREZ, Calderalgu d’Hestoria Moderna. (ULE) nel sou trabayu:
“LA XOSTICIA PEDANIA, EL CONCEYU Y LA XESTIÓN DEL COMÚN COMU REFERIENTES NEL FUNCIONAMIENTU DE LAS COMUNIDAES RURALES DEL REINU DE LLIÓN DURANTE LA ERA MODERNA”
Diznos León Martín Granizo: “ El Conseyu, guei comu nelu antigu, seta aconceyase al toque de turullu (istrumentu de cuernu que produz un soníu broncu al runflare), ou xeneralmente a “campana tañida”, peru siempres nelos llugares tradicionales, de tolos coñocios, siendo oubrigatoriu l’asistimientu al miesmu, baixu determinadas coimas que s’estipulaban nelas “Ordenanzas ou Llibru del Puebru”
Mueitas vegadas el campanariu del Conceyu yera independiente del de la eigrexia. Nela foto restas del antigu campanariu de Piorneru.
Pa más información sobro campanarios conceyiles
👇👇👇👇👇
Amina los alcuerdos setaban sere válidos, independientemente del númberu de vecinos asistentes.
El Conceyu, tien un procedimientu detalláu nel “Llibru del Puebru” cunas suas determinadas normas de cortesía, nun premitiéndose l’asistimientu al miesmu, cun armas nin palos, a nun sere las picayas de los vieyos, teniendo l’orador qu’esponere los sous argumentos al escobiertu.
Tando toos oubrigaos a respetare al “Rexidor” una especie d’atolecedor que ne casos d’esconcordia ou estrupíu, ata podía emponere coimas a los escontraventores.
Asina dicían las ordenanzas de Villamoros: “Iten que nengún vecín tando ne Conceyu tenga la farrucada de xurare, maldicire nin escamonease, y si nun obedez al Rexidor, esixan-seye amina outros cuatrucientos maravedíes”.
La mayoría de las coimas emponías pur escontravenire las Ordenanzas setaban pagase ne vinu, vinu que bien yera bebíu nelas Facenderas (trabayu comunal n’oubras comunes pal puebru) ou al finalizare las asambleyas. En mueitos conceyos bébese ne vasáos ou copas de prata, cul nome del puebru pregáu n’eilla.
👇👇👇👇👇
Los Rexidores yeran ellexios y autorizaos pul puebru y en poblaciones grandes podía habere mésmamente dous vecinos, ellexios comu rexidores.
Martín-Granizo nel sou llibru: “La provincia de León- Paisajes, hombres, costumbres y canciones” Llión 1929, describe outras direiciones de minor importancia.
Los Ascusadores yeran los encamentaos de sustituyire a los rexidores.
El Fiel de fechos, tenía comu misión exercere de secratariu.
Los Taxadores yeran los encamentaos de ditriminare’l valir de las zanas causadas pul ganáu y velare p’avitere la popagación d’enfermedaes ente los rebaños.
"....; ou suspendían ou aprazaban aquéillos, nomándose en dalgunos casos dous miembros ou más pal estudiu y resolución de determinaos menesteres, lu que se denomaba “Ponese de reximientu”, dándose tamién a las presonas que neillas entrevenían el gráficu nome d’Alcurdadores”."
D’estas Ordenanzas populares, salionun istituciones tan demucráticas, sostribables y sociales, comu’l proveitamientu de las devesas mediante los chamaos Quiñones ou Suertes. Asistimientos d’emprestación de trabayu presonal en beneficiu de la coleutividá, comu la Fancedera, cun mediuras de pulicía y llimpieza comu la d’usu del fuéu, la llimpieza de fuentes, xeitu de caminos, revisión añal de las piérgolas y de los fumos.
Outubre y 17, 2009 los vecinos de Valdepolo ausillíos pula A.C. Promonumenta, rïalizan una de las suas tradicionales facenderas pa estrumare, llimpiare y ponere ne funcionamiento, la hestórica fuente romana del sou puebru.
Cítanse las ordenanzas conceyiles del puebru de Cabrillanes que yá s’apricaban, comu mínimu, nel siegru XVI ú recueyen normativa sobro la repoblación forestal y reglaméntase yá estoncias la.“Fiesta del Árbol”.
Al emparu del Conceyu ñacienun istituciones tan homanas y solidarias comu la Requisa de vieyos. Una vesita a los vieyos al entamu del hibiernu, p’asegurase que magar vivieran solos, taban abastecios –y senón suministra-yes – de tou lu menesterousu; farfallos, lleña…etc. p’aguantare un posible aisllamientu prollongáu, pur posibles celelliscas, que torgarán el sou cotidianu socorru.
P.G.T. cita la Requisa de vieyos y outras costumes asemeyadas, nun artículu espublicáu nel 1979 nel selmanariu CERANDA.
Outra istitución benéfica y nesti casu dirixida esclusivamente a los forasteiros, yera’l Palu del Probe qu’oubrigaba al sou portador a dare pousada de bladre pur una nueite al que pasara de camín. Nun solasmentes probes, sinon cualesquier presona.
Coñocemos el feichu de que al entamu de los años 70 un montañeiru qu’esnalabazóu’l sou camín a Cármenes, pula fumia, chegóu mamperdíu y al enfoscare a Cansecu. Nesti puebru acoyienun-ye ata’l día sigiente, cun tal sentíu d’hespitalidá y respetu a las antigas tradiciones, que práuticamente oubrigónun-ye a quedase ensín premiti-ye esandare’l sou camín, naqueilla nueite cun tal ñevada.
Contábanos pur aqueillos años el vieyu molineiru de Cármenes, que’l citáu Palu yera una vara escantillada y cun cabuchales de colores que s’escolingaba d’una ventana bien visible pa que’l caminante pudiera gueyala y supiera a qué casa recurrire nela sua necesidá.
Escolingaba d’esa fachada ata que’l propietariu aguespaba pur un día a un oubrigáu, al día sigiente pasábasela al sou vecín, que la escolingaba nela sua ventana. Asina unu tres outru, percorría’l llistáu de tolos vecinos cun casa nel puebru.
Outras costumes solidarias esistían en toos Los Arguellos, comu ausiliere al vecín que se ye chismóu la sua corte. Mercando ente toos la carne de las reses que se tuvieran que sacreficare y acoyendo las que restaran vivas ente tolas las cortes vecinas, mestantu recostruyíase la prendida.
Recostrución que setaba facese ne Facendera y al dóminu solu premitían-ye los sous vecinos, que pagase’l trabayu coleutivu, cun una cumía pa toos.
Estas y outras ancestrales costumes, describe Maximiliano González Flórez nel sou llibru: “La Montaña de los Argüellos”, Llión 1978
Yá dicía nel 1929 Martín-Granizo nel sou llibru: “Todas estas instituciones y otras muchas que no citamos…”
Normas y costumes que durante siegros fonun y són acallantadas pur un centralismu feroce y espóticu. Un centralismu que siempres tentóu y tenta, restare capacidá y dominio a los vecinos, en beneficiu propiu, en beneficiu d’unos lontanos gobernantes que descoñocen la tierra, la xente y las suas costumes. Peru que deseyan avitere comu seya, que los vecinos xestionen los sous propios entereses comunales comu siempres fízunlu, d’un xeitu tradicional, cercanu y tresparente.
Unas costumes qu’un puebru supo caltenere durante siegros, pleitiando escontra’l saquiu de repotentes ordes militares, nobres de diversu “pelu” y monasterios de diversas “ordes”. Y que dionun comu resultáu, unos llïoneses esperteyáos inteleutualmente e iguaos nelas suas conveiciones.
Un puebru “reglamentarista” que diría Javier Callado. Un puebru respetuousu cunas lleis. Cunas suas lleis.
Cunas suas lleis nela manu, acudienun a la UNESCO pa que yes recoñozan, lu que diversos gobiernos d’Hespaña enxamás recoñocienun. Que eillos són –y non los mondregos que yes siñalan comu “paletos” ou “caviernículas”, los precursores del sistema parllamentariu más antigu del mundo.
Llión, briciu de la
Demucracia representativa urupeya
Bibliografía: “La Provincia de León. Paisajes, hombres y canciones” de León Martín Granizo
Texto en Llïonés de nuestro colaborador Juan Abad.
No hay comentarios:
Publicar un comentario