Sayago Costumbres Creencias y Tradiciones

LA ENFLUENCIA DE LOS ESPÍRITOS MALINOS YA LAS BRUXAS

CREENCIAS NA COMARCA DE SAYAGO. LAS BRUXAS

"La enfluencia de los astros deduzla l'home cona simple oservación. Ve cumu'l Sol ya la Lluna influyen nel medramentu de las plantas, nos fenómenos atmosféricos, nas mareas del mar ya outros feichos. Nun ye d'estrañar que cuandu'n rapaz choraba ensín sentíu aparente, dixérase que taba allunáu, enclusu güei tamién tachámos asina'l qu'esvaria. Esta yera la razón de protexerlu ya percurar nun esponerlu a la lluz de la Lluna, siendu quiciás una creencia introducida pula cultura árabe.

Sigue bien arraigonáu nel llabriegu el costume d'aproveichar la fase de menguante de la lluna pa facer la llantadera de la ceboya, pimientos ya outras plantas. Al perguntar a los llabriegos ya hortolanos sayagueses sobru'l porqué o la razón de facerlu nesos días, responden que de nun ser asina saldrían mueitas plantas machos, que nun darían frutu o ésti sedría poucu bonu. En Menguante curtíase la lleña de guardar, bien si quierse emprear pa facer muebles o bien pa deixala mueitu tiempu almacenada; si cúrtiase n'otra fase nun se caltien, cría caronxu ya estropiase. En Menguante cápense los animales, especialmente los gochos, asina, las enfluencias de la lluna son positivas ya la cortadura nun s'infecta, encarnandu enantes.

Tamién las horas solares tienen la su enfluencia. Los curanderos de Sayago, facen dalgunas de las sus práuticas enantes d'alboriar, cumu pur exemplu'l bañu purificador de personas ya animales, que se faz xustu nel pasu del solsticiu de primavera a branu, día de San Xuan, 24 de xunu, o la recoyida de plantas medecinales tamién esi día xustu enantes de la salida del sol. Igualmente pula contorna sayaguesa ainda s'encamienta'l nun esponerse al sol nos meses que tengan "erre" al considerarlu dañinu ya propensu a catarros.

LA ENFLUENCIA DE LOS ESPÍRITOS MALINOS YA LAS BRUXAS

Las bruxas, el su metamorfismu ya influxos.

Veyamos en primer llugar quien fonun o son bruxas en Sayago. ¿Sedrá, cumu diz el diccionariu, aquellas muyeres a las que se-yes atribuye poder de fechicería pur cuenta de la enfluencia del diañu, pa rializar cosas prodixosas ya dañinas? ¡nun! ¡Nin mueitu menos!. Nesta contorna nun esistienun, esi tipu de bruxas que fonun persiguidas pula Inquisición y pula ilesia. Unu de los sus sínodos convocáu nel s. XVI, prohibía ya establecía penas pa quien dicían palabras o facían xestos sobru los enfermos. N'otru posterior condenábase, so pena d'escomunión, a quien recurriera a la maxia. Durante la Edá Media deillas d'estas bruxas fonun condenadas a ser queimadas na foguera p'acabar cul su influxu ya pa castigar los infanticidios ya outras barbaridades que se-yes atribuyían. Hai sobrada documentación escrita sobru estas persicuciones. Esti tipu de bruxas tenían las sus xuntas o aquelarres en campusantos, vieyas armitas, cruces de caminos, etc. daban ungüentos ya tomaban beberaxos de plantas alucinógenas ya invocaban al diañu, qu'allegaba a la cita en forma de machu cabríu. Cun él baillaban, tenían relaciones sexuales ya coordinaban planes pa facer el mal. Puede deducirse que tantu esas bruxas cumu'l demoniu cumpartían los maleficios. Ata finales del siegru pasáu los sacerdotes recurrían a exorcismos ya ensalmos pa sacar los demonios de las personas ya de las casas. 

Dichu estu sobru las bruxas dedicadas a facer bebedizos, sacrificar rapaces ya outros daños incruentos, pasu a falar de las bruxas sayaguesas, unas bruxas que, más que reales, fonun frutu de la imaxinación de los paisanos. Había quien las identificaba cun esos remolinos de branu, "ehí pasa una "putaciégana", una bruxa", dicían; outros, cunas solombras siempres misteriosas de la nueite, ya outros, cunos animales. Rellataba una sayaguesa, que criárase cunos sus padres molineros nuna aceña del Tormes, que cuandu yera rapazica, una nueite de fuerte xelada, sentíu ruidu de castañuelas ya tamboril al pie de la su casa. Sentíu tamién cumu la su maire dicía-y al su padre "¿Peru nun sientes? Claru que sientu muyer. Duérmite, qu'ellas andan a lu suyu." Pur la mañana, cuandu toos llevantónunse, pudun ver las sus pisadas na xelada, tou alredor de la casa.

Peru nun, sigu insistiendu, las nuesas bruxas de Sayago nin fonun perversas, nin tuvun "conciliábulos". Nun debemos d'identificarlas cumu meigas nin celestinas de filtros amorosos, beberaxos ya polvos de "venteconmigo". La xente de Sayago personificóu o identificóu cumu bruxa a esa probe vieya del pueblu, abangada ya feya qu'había qu'arrodiar, nun deixar que beisara a los rapaces nin dexar-ye entrar na casa o nas dependencias del ganáu. Había qu'evitar el su influxu ya l'efectu maléficu del su agüeyamientu. A estu, la probe vieya vivía ensin saber la mayoría de las vegadas, de que los sus convecinos evitabanla ya teníanla pur bruxa.

Las nuesas bruxas sayaguesas son sobru tou interesadas, "cuzas" cumu dizse pur Sayago. Amiguas d'enteresarse de las cosas del vecín. Invidiosas del bien axenu, peru cumu nun dexaban-yes entrar nas sus casas, tenían que metamorfizarse, camuflarse o camudarse, en pita, dolonciella, perru ya sobremanera en gatu, a poder ser negru pa pasar desapercibíu na escuridá de la nueite. La entrada a la casa axena facíanla al traviés de la chimineya, pechadura o gatera de la puerta. Peru l'agüeyamientu podían exercerlu al cruciarse na rua, beisandu al rapaz, mirandu a los animales...Al paecer, la bruxa nun podía facer dañu a quien quixera bien, anque lu intentara"

Traducción al Llionés: Gus

TEXTO DEL LIBRO: "Sayago Costumbres Creencias y Tradiciones". Juan Antonio Panero.

Pobre Meiga

Deyai a la probe

deyai  la vieya

nun fa mal a naide

n´us metais cun ella.

¿Que dañu vus face

Que la probe´steya

guardada na sua casa

ou ond´ella quiera?

Deyaila ¡cuitada!

Nun-y dedes má guerra,

si ye bruya

y ye bruya de veras

d´aqueillas que colan

pur entre resquiezas

en toas casas,

del que nun tien céula

ni estan bendecidas

ni cruz en la puerta….

Cuentos recogidos por

Caitanu Bardón 1955