La Cuesta -Truitas - La Cabreira - Llión
L’asociación Trimuella de l’aldeya de La Cuesta, no términu municipal de Trueitas, encomienza los preparativus pa la puesta de llargu de lus Campaneirus, la vieya mazcarada d’enviernu, una tradición cun mueita popularidá en Cabreira cun cualesquier de lus sous ñomes, remixacus, tamarracus, mantarracus, campanones, farramacus…
El sábadu lus personaxes volverán a recorrer el conceyu, tras la sua presentación a las 17.30 horas no puebru anfitrión. Bernardo Calvo Brioso, escelente cuñocedor d’estas celebraciones en Zamora y provincias d’alredor va ser l’encargáu de convidanus a una charra sobre las mázcaradas d’enviernu que se van acompañar cun llicores. Despuéis de la charra, lus campaneirus van visitar las tabiernas del conceyu onde se xunta la xente lus sabadus pula tardiquina p’animar a que salgan a las caleyas, pa terminar no bar La Bodega de Trueitas onde van convidar a un chocolate cun churrus a aquel que s’acerque. El diumingu, lus Campaneirus, que van resucitar tras añus namás na memoria, van dar a la salida de misa bollus preñáus y vinu.
La recuperación d’esta tradición foi una rialidá gracias a lus testimonius de lus más mayores, y al trabayu de l’asociación, qu’escueitóu a aqueillus que más saben de lu d’antias. Según Ludivina González y Joaquína Miguélez, muyeres qu’on vivieron de rapazas la mazcarada, lus Campaneirus en La Cuesta celebrábanse en Ñavidá y yieran encarnaus pulus mozus del puebru que se revestían cuna única función d’escorrer a lus rapaces y pidir l’aguinaldu.
Lus Campaneirus cubríense lus cuerpus cun pilleyus y pa la cara y la cimbreira fabricaban mazcaras asemayadas a lus animales. N’oucasiones tamién se ponían curnamientas ou varas de madeira, que tallaban lus rapaces, pa representar al ganáu.
La igresia que nun yiera amiga d’estas tradiciones obrigóu a mudar la fecha de la fiesta, que pasóu a celebrase no antroidu cuno ñome de Trapisacus. Mueitus tapaban la cara y outrus vistíense cunus piores trapus. Foi ñestoncias, cuna teatralización de la tradición cuando xurdieron más personaxes: La Vieya, el Toru, lus Galanes y la Señorita que picaba al toru.
Estiañu meyororun lus traxes, mueitu más asemeyaus a la investigación feita pur Iván Martínez Lobo, y incorporan distintas mázcaras ou “carochas” de lus puebrus cercanus pa facer una representación de tódalas mazcaradas de la comarca cabreiresa. D’eigual xeitu están tratando de recuperar tódolus personaxes de la localidá, pero la falta de medius económicus nun-yos deixa atopar ñuevus traxes, onque estiañu recuperarán a la Señorita, una muyier que cuna cara cubierta, picaba al toru pur qu’emburriara a la xente.
Publicau nel CABREIRES
http://www.elcabreires.com/los-campaneirus-salen-pa-santutisu
Festival Internacional de la Mascara Iberica (FIMI) de este año. 2016
http://raigame.blogspot.com.es/2016/01/fimi-festival-internacional-de-la.html
Localidades del País Leonés donde se celebran
mascaras de invierno
La siguiente muestra de las ancestrales Mascaras de Invierno leonesas, será en Riaño el día 6 de Febrero.
No hay comentarios:
Publicar un comentario